上次筆者寫了篇《投資移民可以“趙完鬆“嗎？》受到網友俾面勁Like! 不過，網友很快俾個問題我，投資移民點先可以“趙完鬆”？
依個問題好似孫耀威首《愛的故事》一樣，上集鬼死咁好聽，下集就，唉，麻麻地!
有看上集的網友都知道，移民人士要先在臺灣成立一家外資公司(點解會係外資公司？你都未係臺灣人，你間公司當然係外資公司啦!)
移民人士再從香港匯入等值新臺幣600萬的港幣，結匯後，全數投資在貴寶號，經投審會完成資金審核後，移民人士便可以動用該筆600萬新台幣支付與公司營運有關的開支和購買相關設備。
投資人土在台灣坐滿1年移民監後(即係連續居留滿1年，期內離境不超過30日) ，便可以入籍取得台灣身份證。既然老闆變咗做台灣人，公司亦可以申請變更為台灣本地公司。
搞掂公司變更“國籍”後，就係“趙完鬆”機會。你可以再沒有繼續營運需求為理由，找個會計師幫手結束台灣公司，不過最緊要沒有負債，需時約6個月，便可撤回餘下的資金到自己帳戶。至於匯回香港，主要睇下仲剩番幾多。
雖然臺灣仍然實行外匯管制措施，但只針對金額超過500萬元先要央行預批，你筆新臺幣 600萬投資額，營運一年，燈油火蠟，又要俾稅又要俾費用，斷估點賺都唔會滾存到咁大，所以外匯管制措施唔關你事!
反而，洗錢防治相關規定可能有d影響。每次超過五十萬台幣(等值外幣) 便需填寫申報單，咁樣睇黎，”趙完” 可能都要分幾次“鬆”!
